Pagtakilid Pahalayo nagpakita sa mga bag-ong buhat-alampat ni Ronyel Compra, mga mugna sa papel kansang mga palid nanahimong parehong sulatanan ug hisgutanan. Binuhat sa kinamot ug gipangtapot-tapot nga papel manila, japanese washi, mga gitigum nga tinipak ug yutang gipang-anay, iya kining gihulag ug gipangporma lahos ug ibabaw sa mga pligo. Gipangkutkut, gipangputol, gibaid-baid, gipusa-pusa hangtud sa hinayhinay ang papel nangagupok. 

Ang papel, nga kasagrang gigamit sa pagtimaan sa kasabutan ug paghandum sa kasaysayan, gipakita dinhi sa mga mugna ni Compra, nga mahuyang ug dali magisi. Mga palid nagkupot dungan nangabugto, nagtipun-og ang mga marka nga naghulga sa iyang kalig-on . Ang mga obra nahimong arkibo sa malimtanon nga panumduman:  dili malungtaron, kanunayng mausabon, lumalabay subay sa bag-ong panahon. Ang matag usa ka mugna naglihok taliwala sa pagtindog ug pagkahugno, diin ang kahuyang ug ang kaisog nagkuyog ug nagduyog.

Pinaagi niini, ang mga obra nga gipakita sa “pagtakilid pahalayo’ nagtanyag ug lahi nga panabot sa paghandum. Dili tunhay apan aktibo kanunay, usa ka nagpadayon ug walay hunong nga proseso. Ang paghandum diay usa ka pagtipig sa mga tipik nga nahabilin bisan pa man ang tanang butang moagi ug kabag-ohan. Ang pagtimaan diay usa ka pamaagi sa pag-ila sa unsay anaa bisan pa man sa ngadto-ngadto sa kahanawan ra gihapon ang iyang padulngan.

Sinulat ni Ligaya Salazar og Hinubad ni Jay Nathan Jore